Malayalam-poem-Zoo Prisoners (ബെന്നാർഘട്ടയിലെ തടവുകാർ)

ബെന്നാർഘട്ടയിലെ* തടവുകാർ
**************************

മൃഗശാലകളെത്ര കണ്ടിരിക്കുന്നു;
സിംഗപ്പൂരിലും തൃശൂരിലും
മൈസൂരിലും എവിടെയായാലും
പരോളുകിട്ടാത്തടവുകാർ
കാരിരുമ്പാഴത്തിലഴിയിട്ട നോവിൻ
കരളുമായ് കാത്തിരിക്കുന്നു...
ഏതു മുജ്ജന്മ പാപങ്ങളാണീ
സാധുക്കളെ കാടു കടത്തി
ഹരിതമൊരു തരി പോലുമില്ലാ-
ത്തൊരിക്കൂട്ടിൽ തടവിലിട്ടു.

ഇന്നു ഞാനീ ബെന്നാർഘട്ടയിൽ
മൃഗശാലപ്പാതിക്കപ്പുറം
കൊടിയകാടിൻ തടവറപ്പച്ചയിൽ
അഴിച്ചിട്ട സിംഹസ്വാതന്ത്ര്യ-
ഗർജ്ജനം പേടിച്ച,ഴിയിട്ട ബസിൽ
മൃഗങ്ങളെക്കണ്ടിരിക്കവേ
തടവൊരു നാനാർത്ഥമായ് വന്നു്
കൂടുകൂട്ടുന്നെന്റെ ചുറ്റിലും....
-------

* ബെന്നാർഘട്ട മൃഗശാലയിലെ സഫാരിക്കിടെയുള്ള ചിന്തകൾ...