Malayalam-poem-Confession-കുമ്പസാരം

കുമ്പസാരം കഴിയുമ്പോഴുള്ള ചില തീരുമാനങ്ങൾ
************************************
തെറ്റിയ "പത്തുകൽപ്പനകൾ "
ഏറ്റുപറഞ്ഞിറങ്ങുമ്പോൾ
മനസ്താപജപങ്ങളിലൂടെ
മനസ്സിലേക്കൊരു മഴ പെയ്യുന്നു.

തീരുമാനങ്ങളുടെ വസന്തമാണിനി...
പുതിയ ജീവിതം നനച്ചൊരുക്കണം.
തത്തകളുടെ നഗരത്തിൽ നിന്നും
കിനാവിന്റെ ഒരു തരി പച്ച...,
മരുഭൂവിൽ നിന്നൊരു പിടി മണൽ ,
സങ്കീർത്തനത്തിന്റെ പുസ്തകത്തിൽ 
നിന്നും വിലാപം കഴിഞ്ഞവന്റെ
നേർച്ചയിറ്റുന്നൊരു വാക്ക്‌...,
അമ്മ തന്ന വെഞ്ചിരിച്ച കൊന്ത,
ഇസ്തിരിയിട്ട സ്നേഹം കൊണ്ട്‌
മക്കൾക്ക്‌ വാരിക്കൊടുക്കാൻ
കനിവു വറ്റാത്ത ഒരു ചോറുരുള,
വേരുമിലകളും പ്രണയിക്കും പോലെ
പ്രിയതമയ്ക്കൊരു ചുംബനപ്പാതി;
തടവുശിക്ഷ കഴിഞ്ഞ കുഞ്ഞുങ്ങളുടെ
അനാഥാലയത്തിലിടക്കിടെ
പങ്കു വയ്ക്കാനിറ്റു കരുണ...

ജീവിതത്തിന്റെ പാനപാത്രത്തിൽ
പറന്നിറങ്ങുന്നൂ വെളുത്ത പൂവുകൾ ...
------