Malayalam-Poem-WhoAmI-ആരാണു-ഞാൻ

ആരാണു ഞാൻ
----------------------
ആരാണു ഞാൻ നിന-
ക്കെന്നു ചോദിക്കുന്നു
തോരാത്ത നോവിന്റെ
ചോരയിറ്റുന്നവൻ...


-----

Malayalam-Poem-San-Jose സാൻ ഹോസെ

സാൻ ഹോസെ (City of San Jose)
--------------------
വിജന ശൈത്യത്തിൻ
തണുത്ത പാതയിൽ
അടഞ്ഞ കണ്ണുകൾ
നടന്നു പോകുന്നു ...

നഗരമൊരടച്ചിട്ട
വാതിലായ്
തുറന്നു കിടപ്പാണീ-
ഒറ്റ മുറി വീട്ടിൽ.

---

Malayalam-poem-ഉയിർത്തെഴുന്നേൽക്കുന്ന-വഴികൾ

ഉയിർത്തെഴുന്നേൽക്കുന്ന വഴികൾ
***********************

കുറേ മഴകളും കണ്ണിരുമൊഴുകിയ
കല്ലും മുള്ളും നിറഞ്ഞ കാട്ടുപാത
ദൂരെ കയറ്റത്തിന്റെയറ്റമുള്ള പച്ച
കാട്ടുവാനാവാതെ ചോരയിറ്റുന്നു..

ഏകാന്തദൂരത്തിൻ നഗര ബസലിക്ക;
ഞായറാഴ്ച കുർബാനയിൽനിന്നും
സങ്കീർത്തനം പോലുള്ളൊരു വഴി
ഉയിർത്തെഴുന്നേറ്റിറങ്ങി വരുന്നു...
--------

Malayalam-poem-Boundaries-അതിർവരമ്പുകൾ

അതിർവരമ്പുകൾ
***************
ആശകളനാവശ്യം
വേണ്ടെന്നു തഥാഗതൻ
ചൊല്ലുന്നു;
മാരീചനായെത്തുന്നു
സാത്താനൊരാൾ...
പൂത്തകാമത്തിന്നിരു-
ട്ടൊളിക്കുമിടങ്ങളിൽ,
ആളില്ലാ വണ്ടിക്കുള്ളിൽ,
തൂങ്ങിയാടുന്ന ലിഫ്റ്റിൽ...

എത്രയോ വിദൂരമാ-
ണതിരിൻ മരുപ്പച്ച
പെട്ടെന്നു മായും കിനാ-
ക്കുളിർമഞ്ഞല പോലെ...
----

Malayalam-poem-GreenTree-And-DryTree-ഉണക്കമരം-പച്ചമരം

ഉണക്കമരം, പച്ചമരം
******************
പച്ചമരമൊച്ച വച്ചാർക്കുന്നു...
പൂക്കും നിറങ്ങളിലെത്തുന്നു 
കൂട്ടമായ് കിനാമധു 
കുടിച്ചു വറ്റിക്കുന്നവർ ...
കൂടുകൂട്ടുന്നു കുരുവികൾ
കുളിരുവറ്റാത്ത ചില്ലയിൽ ...

തൊട്ടടുത്തൊറ്റക്കൊരാൾ
ഞെട്ടറ്റിരിക്കുന്നു മൗനിയായ്
ഉണക്കമരം, ആളൊഴിഞ്ഞ
സത്രമായ് കിളിക്കൂടുകൾ ...
താഴെയൊരാൾ എരിയും
കനലുമായ് കാത്തിരിപ്പാണ -
ടുപ്പത്തത്താഴമൊരുക്കുവാൻ ;
മരമൊരു ചില്ല നീട്ടുന്നു...
----

Malayalam-poem-Hospital-Of-The-Grasshopper-പച്ചത്തത്ത

പച്ചത്തത്തയുടെ ആശുപത്രി
*********************

ശിശിരാങ്കിതമിക്കൊടും തണുപ്പിൽ
കാലേയെഴുന്നേറ്റു വാതിൽ തുറക്കെ,
നനഞ്ഞു വിറച്ചീ കോലായിലുണ്ട്
കാലൊടിഞ്ഞൊരു പച്ചത്തത്ത.

തിരക്കാണു ജീവിതം ; മരുന്നോ,
പച്ചത്തത്തകൾക്കാശുപത്രിയോ
ഇല്ലാത്തതിനാൽ, ഒന്നുമേ കാണാതെ,
തിരിഞ്ഞൊന്നു നോക്കാതെ പോകണം...

ഉള്ളു ചൊല്ലുന്നുറുമ്പരിക്കുവാനീ
പച്ചയെ വിട്ടേച്ചു നീ പോകുന്നുവോ?
മെല്ലെയാ പച്ചയിറ്റും കരച്ചിൽ
പൂട്ടിയ താക്കോലിനാലെടുക്കുന്നു.
തൊടിയിലെ തുളസിയാശുപത്രിയിൽ
കടമെടുത്ത പച്ച വാർഡിൽ വച്ചു
പച്ചത്തത്ത മുത്തശ്ശി മൊഴിയാകുന്നു;
ഭാഗ്യത്തിൻ പച്ചമണം പരക്കുന്നു.
---------

Malayalam-poem-Confession-കുമ്പസാരം

കുമ്പസാരം കഴിയുമ്പോഴുള്ള ചില തീരുമാനങ്ങൾ
************************************
തെറ്റിയ "പത്തുകൽപ്പനകൾ "
ഏറ്റുപറഞ്ഞിറങ്ങുമ്പോൾ
മനസ്താപജപങ്ങളിലൂടെ
മനസ്സിലേക്കൊരു മഴ പെയ്യുന്നു.

തീരുമാനങ്ങളുടെ വസന്തമാണിനി...
പുതിയ ജീവിതം നനച്ചൊരുക്കണം.
തത്തകളുടെ നഗരത്തിൽ നിന്നും
കിനാവിന്റെ ഒരു തരി പച്ച...,
മരുഭൂവിൽ നിന്നൊരു പിടി മണൽ ,
സങ്കീർത്തനത്തിന്റെ പുസ്തകത്തിൽ 
നിന്നും വിലാപം കഴിഞ്ഞവന്റെ
നേർച്ചയിറ്റുന്നൊരു വാക്ക്‌...,
അമ്മ തന്ന വെഞ്ചിരിച്ച കൊന്ത,
ഇസ്തിരിയിട്ട സ്നേഹം കൊണ്ട്‌
മക്കൾക്ക്‌ വാരിക്കൊടുക്കാൻ
കനിവു വറ്റാത്ത ഒരു ചോറുരുള,
വേരുമിലകളും പ്രണയിക്കും പോലെ
പ്രിയതമയ്ക്കൊരു ചുംബനപ്പാതി;
തടവുശിക്ഷ കഴിഞ്ഞ കുഞ്ഞുങ്ങളുടെ
അനാഥാലയത്തിലിടക്കിടെ
പങ്കു വയ്ക്കാനിറ്റു കരുണ...

ജീവിതത്തിന്റെ പാനപാത്രത്തിൽ
പറന്നിറങ്ങുന്നൂ വെളുത്ത പൂവുകൾ ...
------